Plantun de Prouvènço

Pèr coumpara dos planto d'encò nostre

Eryngium campestre & Cyperus esculentus

Panicau

Eryngium campestre

Apiaceae Umbelliferae

Àutri noum : Erbo-Roulant, Pan-blanc-d'ase, Barbo-de-cabro, Clouco.

Noms en français : Panicaut champêtre, Chardon Roland.

Descripcioun :
Planto bèn couneigudo di proun espinouso que sèmblo un cardoun (Asteraceae), mai èi bèn uno Apiaceae. L'ivèr s'atrobo que li fueio pièi mounto en flour l'estiéu.

Usanço :
S'acampon li racino avans la flouresoun. Lou panicau èi couneigu desempièi l'antiquita pèr èstre un bon diureti. Ei vertuous peréu contro li ceben (fleiroun) coume lou raporto P. Lieutaghi. Li jòuini fueio podon èstre mesclado is ensalado.

Port : Erbo
Taio : Pancaro entresigna
Fueio : alterno
Tipe bioulougico : Emicriptoufite
Cicle bioulougico : Planto renadivo

Gènre : Eryngium
Famiho : Apiaceae
Famiho classico : Umbelliferae

Ordre : Apiales

Coulour de la flour : Blanco
Petalo : 5
Ø (o loungour) flour : Pancaro entresigna
Flourido : Estiéu

Sòu : Ca
Autour basso e auto : 0 à 1600 m
Aparado : Noun

Liò : Roucaio - Garrigo - Colo
Estànci : Termoumediterran à Mountagnard
Couroulougi : Pancaro entresigna
Ref. sc. : Eryngium campestre L., 1753

Triangle(-manjadis)

Cyperus esculentus

Cyperaceae

Nom en français : Souchet comestible.

Descripcioun :
Lou triangle-manjadis trachis dins li limas de ribiero o li culturo. Pèr l'ouro n'i'a pas gaire au nostre, soulamen un pau au couchant. Se recounèis à sis enflourejado jauno daurado e subretout à si cabosso o tubercule. Douno un pau d'èr à Cyperus rotundus que fai de cabosso negro. La varieta presentado eici, Leptostachyus, èi naturalisado (óurigino Americo de l'uba).

Usanço :
Coume lou dis soun noum es uno planto manjadisso. En Espagno s'adoubo emé lou tubercule l'horchata de chufa, valènt-à-dire l'ourjado de triangle. Se fai tambèn un òli de qualita, richo en vitamino E e bon pèr la pèu.